C/Compilar un programa

En Wikibooks, o Galilibros en galego.

Despois de editar o ficheiro de texto simple e escribir nel un programa en linguaxe C, toca compilar tido programa. Isto é, traducir o ficheiro de texto simple en C a un ficheiro binario, é dicir, en linguaxe máquina, que o computador poida entender. Esta tarefa realizarémola co compilador da nosa elección. Se non tes un compilador, volve ao apartado dos requisitos, no que se nomeaba algún programa para compilar.

[editar] Proceso de compilación

O proceso de compilación consta de certas fases.

En primeiro lugar está a fase do preprocesador (un programa que forma parte do compilador). Nas primeiras liñas dun programa en C sitúanse unha serie de instrucións para o preprocesador. Son aquelas que comezan co símbolo #. Ditas ordes indícanlle ao precompilador, entre outras cousas, en que ficheiros atopar as distintas funcións utilizadas no programa. Asemade, o precompilador elimina espazos e saltos de liña que puxemos no código fonte como unha axuda visual para a comprensión do código, pero que o compilador non vai necesitar ou comprender.

A continuación realízase unha análise sintáctica e semántica das instrucións do código fonte, mediante a cal o compilador se asegura de que non vai haber ningún erro á hora da compilación.

Así, feita a análise, procédese á verdadeira compilación. Esta dá como resultado os diferentes programas obxecto.

[editar] Programas obxecto

Como resultado da compilación, obteremos un ou varios programas obxecto. Un código fonte pode conter varias funcións, algunhas forman parte do compilador, pero outras poden ser obra do propio desenvolvedor, e estas funcións do desenvolvedor poden atoparse no ficheiro do código fonte principal ou ben noutros ficheiros de código fonte aos que se fai referencia dende o ficheiro do código fonte principal. O compilador compilará o contido de cada un destes ficheiros por separado, orixinando distintos binarios, chamados programas obxecto.

Deste xeito, de producirse algún erro de execución, o programa non vai ter que volver compilarse completamente. Se o programa está dividido en distintos ficheiros, só será necesario corrixir os erros dos ficheiros afectados, e compilar unicamente ditos ficheiros. Pero separados, estes ficheiros non poden executarse. Haberá que ligalos.

[editar] Erros

Durante a análise que se produce durante o proceso de compilación poden xurdir erros de compilación. Ante erros de compilación, esta cancelarase, e teremos que corrixilos. Xeralmente o propio compilador indicaranos en que liña se atopou cos erros, e con máis ou menos detalles diranos cal foi o erro. Entre os erros máis habituais están:

• non rematar unha sentencia cun punto e coma (;), ou
• situar o else dunha sentencia if despois de sentencias que están fora do if.

Máis adiante comprenderás o que significan estes erros, e a base de práctica e máis práctica aprenderás a corrixilos á primeira. Pero vaite afacendo á idea de que sempre que intentes compilar un programa por vez primeira vai aparecer algún erro. Isto pásalles a todos, tanto ao estudante coma ao profesional. Non hai nada de malo en que aparezan erros. O malo sería non dalos corrixido.

Unha vez corrixidos os erros, toca volver intentar a compilación. Se volven aparecer erros, teremos que volver revisar o código para solucionalos. En caso de que a compilación se realice correctamente, poderemos continuar.