C/Historia de C

En Wikibooks, o Galilibros en galego.

O campo da informática tal e como o coñecemos hoxe en día comezou no ano 1947 con tres científicos do Bell Telephone Laboratories: William Shockley, Walter Brattain, e John Bardeen. Estes tres científicos foron os autores dun invento revolucionario: o transistor. No 1956, a primeira computadora baseada completamente en transistores, TX-0, completouse no MIT. O primeiro circuito integrado creouno en 1958 Jack Kilby en Texas Instruments. Mais a primeira linguaxe de programación de alto nivel existira desde antes daquela.

En 1954, o proxecto Fortran, acrónimo de Formula Translator (tradutor de fórmulas), deu comezo. A Fortran seguiulle en 1958 Algol 58, acrónimo de Algorithmic Language (linguaxe algorítmica). A éste seguiulle en 1960 Algol 60, e a éste CPL, siglas de Combined Programming Language (linguaxe de programación combinada) en 1963. Logo pasouse en 1967 a BCPL, siglas de Basic CPL (CPL básico), o cal desenvolvérase co obxectivo de escribir software e compiladores de sistemas operativos. Máis adiante, en 1969, apareceu B, que en 1971 daría lugar a C.

B foi a primeira linguaxe directamente na liñaxe de C. Creouna Ken Thompson nos laboratorios Bell e foi unha linguaxe interpretada utilizada nas primeiras versións internas do sistema operativo UNIX, e fora elaborada co obxectivo de recodificar o sistema operativo usando unha linguaxe de alto nivel máis portable e flexible. Thompson e Dennis Ritchie, tamén dos laboratorios Bell, melloraron B e chamárona NB. Extensións posteriores a NB deron lugar ao seu sucesor natural, C, unha linguaxe compilada. Gran parte de UNIX, que fora rescrito en NB, foino entón en C, o que orixinou un sistema operativo máis portable.

O portabilidade de UNIX foi o principal motivo da popularidade inicial de UNIX e C. De xeito que en lugar de crearen un sistema operativo novo para cada nova máquina, os programadores do sistema poderían escribir simplemente un par de dependencias do sistema necesarias para a máquina, e escribir un compilador de C para o novo sistema. De aí en adiante, xa que a maior parte das utilidades do sistema estaban escritas en C, parecía o máis lóxico escribir as novas utilidades nesa linguaxe.

Logo, en 1983, o ANSI (Instituto de Estándars Nacionais dos Estados Unidos) estandarizaría C, e entre 1983 e 1984 Bjarne Stroustrup, dos laboratorios Bell, crearía C++, "C con Clases".