HTML/Código
En Wikibooks, o Galilibros en galego.
| HTML | ||
| ← Volver a Ola mundo! | Código | Seguir con Estrutura dos documentos → |
Como o seu propio nome indica, o HTML é unha linguaxe de "etiquetado". Se temos un texto e queremos convertilo nunha páxina web temos que ir engadíndolle etiquetas que identifiquen o que é cada cousa e a forma na que ha de amosarse.
Para isto, o HTML fornécenos tres conceptos fundamentais: elemento, atributo e valor. Para a súa representación, utilizaremos as etiquetas.
Índice |
[editar] Sintaxe fundamental
A sintaxe da linguaxe HTML estrutúrase deste modo:
-
- Unha etiqueta inicial que sinala o comezo dun elemento,
- uns atributos, á súa vez cun valor asociado a cada un deles;
- un contido, caracteres e outros elementos;
- e unha etiqueta que marca a fin do elemento.
Moitos elementos HTML inclúen atributos específicos nas etiquetas iniciais que definen o comportamento ou indican propiedades adicionais de tales elementos. Para algúns elementos, a etiqueta que delimita a súa fin é opcional, se ben por regra xeral recoméndase incluíla. Nalgúns casos concretos, un elemento baleiro pode non contar cunha etiqueta final que delimite o ámbito no que ten efecto.
O exemplo da imaxe daría coma resultado un parágrafo. Varios parágrafos nun documento presentarían a seguinte forma no código:
<p>Isto é un parágrafo.</p> <p>E isto outro.</p>
E serían lidos polo navegador do seguinte xeito:
Isto é un parágrafo.
E isto outro.
[editar] Elemento e etiqueta
Non debemos confundir elementos e etiquetas. As etiquetas son unha plasmación textual dos elementos. Por exemplo: o elemento html sempre está presente nun documento HTML, porén as súas etiquetas son opcionais, poden omitirse, aínda que non se recomenda facelo.
As etiquetas (tags en inglés) teñen moita importancia nos documentos HTML, posto que fornecen información especial que se utiliza para determinar a maneira en que se renderizará o documento, e por tanto como vai ser o seu aspecto final. Isto quere dicir que, onde se defina unha etiqueta no código, algo ha ocorrer na representación do documento, ben visualmente ben de maneira oculta.
Todas as etiquetas comparten o mesmo formato: comezan co signo "<" e rematan co signo ">".
Por exemplo: o elemento html ten dous etiquetas:
- a etiqueta de inicio <html> define o inicio do documento HTML,
- a etiqueta de peche </html> define o final do documento HTML.
Estas etiquetas indícanlle ao navegador que todo o que aparece entre elas ha de ser interpretado coma un documento HTML. A etiquetafinal diferénciase da inicial polo signo "/". Se non houbese tal signo non poderiamos saber, por exemplo, cando remata un elemento <div>, posto que pode conter dentro outros.
[editar] Maiúsculas e minúsculas nas etiquetas
En HTML, as etiquetas podes escribirse en calquera combinación de maiúsculas e minúsculas. É dicir, valerían as formas <html>, <HTML>, <Html>, <hTmL>, etc.
Así e todo, recoméndase utilizar sempre a forma en letras minúsculas, <html>, posto que nun futuro poderiamos combinar o HTML con outras tecnoloxías que non fosen tan permisivas, e só aceptasen esta forma. Mellor ir afacéndonos agora que lamentalo nun futuro.
[editar] Atributo e valor
Atributo e valor son as propiedades que se lles pode asignar aos elementos. Por exemplo, ao elemento html pódeselle asignar un atributo para indicar a lingua na que está escrito o documento, este atributo é lang, e podemos asignarlle como valor o código da lingua, gl no caso de estar en galego[1].
<html lang="gl"> [...] </html>
É dicir,
<elemento atributo="valor"> ... </elemento>
Por suposto, un elemento pode ter varios atributos:
<elemento atributo="valor" atributo="valor"> ... </elemento>
Os atributos hai que situalos na etiqueta inicial, nunca na final. A orde dos atributos dentro da etiqueta é indiferente, se ben soe facilitar o traballo co documento o utilizar unha orde concreta para os atributos de cada tipo de etiqueta. Os atributos hai que separalos, como se amosou nos exemplos, do nome do elemento e dos outros atributos. Así mesmo, atributo e valor están unidos por un signo =, e os valores adoitan poñerse sempre entre comiñas dobles (") ou simples ('), aínda que o seu uso non é necesario cando o valor é un só número ou palabra.
[editar] Explícito e implícito
Ao crear ou editar un documento HTML, pódenselle asignar atributos a un elemento de maneira explícita, ou non facelo. Non facelo non significa que necesariamente o elemento non teña atributos asignados. É dicir, o elemento pode ter atributos implícitos obedecendo á especificación do W3C (do que falaramos na historia da World Wide Web), ou como resulta máis habitual, pode que a especificación lle outorgue liberdade aos navegadores para que lle asignen atributos aos elementos de acordo co criterio da propia aplicación.
Por exemplo, cando escribimos un texto, pode que necesitemos salientar algunha frase ou palabra importante. Para iso, HTML fornécenos o elemento em para enfatizar texto, pero a especificación non indica a maneira concreta de facelo; se o autor tampouyco o fai, a aplicación do usuario é libre de actuar. A meirande parte dos navegadores amosan en cursiva os textos marcados coa etiqueta em, pero isto é só unha elección dos navegadores, non unha característica propia de em, como veremos no capítulo sobre formatar texto.
[editar] Notas
- ↑ Para unha lista de códigos de linguas, véxase no apéndice Códigos lingüísticos.
| HTML | ||
| ← Volver a Ola mundo! | Código | Seguir con Estrutura dos documentos → |
