Análise e deseño detallado de aplicacións de informática e de xestión/Entradas e saídas do proceso de desenvolvemento

En Galilibros, o Wikibooks en galego.
Saltar ata a navegación Saltar á procura


No proceso de desenvolvemento dunha base de datos, podemos considerar unha serie de entradas e saídas.

Entradas[editar]

Requisitos de información e obxectivos especificados ao proporse o deseño da base de datos. Estes requisitos obteranse das entrevistas cos usuarios, da análise dos documentos a xerar e mais cos obxectivos da organización.

Requisitos dos procesos, é dicir, as características que deben cumprir os programas que actúen sobre a base de datos.

Especificacións do sistema de xestión de bases de datos que incluirán o modelo de datos soportado, ademais das características de rendemento, seguridade, linguaxes, etc. Tamén cómpre estudar os distintos módulos e ferramentas que poidan facilitar os deseños lóxico e físico da base de datos. Algunhas destas ferramentas poden proporcionalas tamén provedores distintos dos do SXBD.

Configuración do equipo físico e do sistema operativo que dalgunha forma influirán no desenvolvemento da base de datos, así como a etapa de deseño físico e axuste da mesma.

Saídas[editar]

Estruturas lóxicas de datos. Como resultado do proceso de desenvolvemento obteranse o esquema conceptual, o esquema lóxico no modelo soportado polo SXBD, así como algunhas das principais vistas de usuario que se precisen para comunicarse coa base de datos.

Estrutura de almacenamento, é dicir, o esquema interno, onde se especificarán os parámetros e aspectos de deseño físico do sistema, como son as particións, definicións de espazo, índices, agrupamentos, etc.

Normativa de explotación, onde se incluirán aspectos de seguridade para a explotación e mantemento da base de datos.

Especificacións para as aplicacións, para as que se determinan certas características a cumprir, especialmente no relativo ao mantemento da seguridade da base de datos, que non poden recollerse no esquema.