Análise e deseño detallado de aplicacións de informática e de xestión/Fases do deseño de bases de datos

En Galilibros, o Wikibooks en galego.


O deseño de bases de datos descomponse en:

  • deseño conceptual,
  • deseño lóxico e
  • deseño físico.

O deseño de bases de datos representa un enfoque orientado aos datos para o desenvolvemento dos sistemas de información: toda a atención do proceso de deseño céntrase nos datos e mailas súas propiedades. Cun enfoque orientado aos datos, primeiro deséñase a base de datos, logo as aplicacións que a utilizan.

Deseño conceptual[editar]

O deseño conceptual parte da especificación de requisitos e o seu resultado é o esquema conceptual da base de datos. Un esquema conceptual é unha descrición de alto nivel da estrutura da base de datos, independente do SXBD que se utilice para manipulala.

Para describir o esquema conceptual utilízase un modelo conceptual (coma o modelo entidade-relación).

O propósito do deseño conceptual é describir o contido da información da base de datos, máis que as estruturas de almacenamento que serán necesarias para manexar esta información. En realidade, o deseño conceptual debe facerse aínda cando a implantación final non use un SXBD, senón ficheiros convencionais e linguaxes de programación.

Deseño lóxico[editar]

O deseño lóxico parte do esquema conceptual e dá como resultado un esquema lóxico. O esquema lóxico é unha descrición da estrutura da base de datos que pode procesar o SXBD.

Para especificar un esquema lóxico utilízase un modelo de datos lóxico (relacional, de redes ou xerárquico).

O deseño lóxico depende da clase de modelo de datos usado polo SXBD, non do SXBD utilizado.

Deseño físico[editar]

O deseño físico parte do esquema lóxico e dá como resultado un esquema físico ou interno. Un esquema físico é unha descrición da implantación dunha base de datos no dispositivo secundario. Describe as estruturas de almacenamento e mailos métodos usados para ter un acceso efectivo aos datos.

Unha vez completo o deseño físico dunha base de datos, os esquemas lóxico e físico exprésanse facendo uso da linguaxe de definición de datos do SXBD. A base de datos créase e énchese cos valores que se obtivesen por observación dos sucesos do mundo real. A continuación as aplicacións que usan as bases de datos poden especificarse, implantarse e probarse completamente.