HTML/Requisitos

En Wikibooks, o Galilibros en galego.

[editar] Coñecementos

Calquera usuario con coñecementos básicos de informática está capacitado para a aprendizaxe de HTML. De feito, o único que se necesita é saber manexar o rato e mailo teclado, e ter ganas de aprender.

[editar] Ferramentas

Para realizar e probar páxinas HTML, vas necesitar un editor e un navegador web. O HTML pode editarse en editores de texto (non en procesadores de texto), mesmo naqueles que salientan as etiquetas HTML con cores para facelas máis lexibles. Tamén existen os chamados editores WYSIWYG (What You See Is What You Get, inglés para "o que ves é o que hai") de HTML, e editores WYSIWYG complexos con xestor de proxectos de sitios web e ambiente de desenvolvemento.

No que respecta aos editores de texto, temos á nosa disposición:

• Multiplataforma: GNU Emacs, jEdit...
• GNU/Linux: Gedit (GNOME), Kate (KDE), Vi, Vim, GNU nano...
• Mac OS: Vim (execútase co comando vi desde a consola), Aquamacs Emacs...
• Microsoft Windows: Notepad++.

Entre os editores de tipo WYSIWYG cabe salientar KompoZer.

Tamén vas precisar un navegador web. Para asegurarte de que a meirande parte dos lectores ven ben os teus documentos, convén que os probes nun bo número de navegadores distintos. Os navegadores adoitan renderizar de maneira lixeiramente diferente as páxinas, mesmo ás veces as len mal a pesar de as escribires ben. Deberías preocuparte de que os teus documentos se lean correctamente en navegadores coma o Mozilla Firefox, o Google Chrome, o Microsoft Internet Explorer, o Safari de Mac OS, o Konqueror de KDE, ou o Opera. Tamén podes asegurarte de que se poden ler os teus documentos en modo texto utilizando o navegador Lynx.