C/Ola mundo

En Wikibooks, o Galilibros en galego.

Ken e Dennis, os creadores da linguaxe C, presentaron a linguaxe C no seu famoso libro A Linguaxe de Programación C cun sinxelo programa que amosaba un saúdo pola pantalla. Desde entón fíxose tradición comezar con calquera linguaxe de programación con este exemplo.

[editar] Código fonte

O seguinte código fonte programado en C imprime en pantalla o texto "Ola mundo!":

/* O noso primeiro programa en C */
 
//Incluímos a biblioteca standard input output
#include <stdio.h>
 
main()
{
	printf("Ola mundo!\n");
 }

[editar] Vaiamos por partes

A continuación vai un explicación detallada do programa:

• A primeira liña do programa é un comentario con inicio /* e final /*, é ignorado polo compilador, así que non se executa. Xa no capítulo inicial falaramos da importancia dos comentarios no código fonte dos programas.
• Séguelle outro comentario, desta vez unha liña precedida de //, que por suposto tamén é ignorada polo compilador.
• Logo usamos #include, como indica o comentario a continuación, que se utiliza para ligar ao noso programa as bibliotecas (tamén chamadas librarías) que vai precisar, e con el incluímos a biblioteca stdio.h (standard input output) entre os símbolos < e >. Esta blibioteca adoita introducirse en todos os programas en C, incluso nalgúns programiñas moi sinxelos que non precisan dela, e contén algunhas das funcións máis habituais da linguaxe C.
• Síguelle a liña main(), que é unha función e forma parte de todo programa escrito en C. Polo tanto, toda linguaxe comeza a executarse a partires desa función que traducida quere dicir "principal".
• As chaves sinalan o comezo { e mailo final } da función principal, e xamáis deben de faltar. O contido entre as chaves denomínase bloque.
• Dentro do bloque atoparémonos coa función printf(), que é a que se encarga de imprimir en pantalla un texto. Esta función debe recibir algo para imprimir, neste caso é unha oración, que en programación recibe o nome de cadea de caracteres. As comiñas non se imprimen, soamente determinan o comezo e mailo remate da cadea. Máis adiante explicarase cómo introducir comiñas e outros símbolos no texto.

Esta función imprime en pantalla: Ola mundo!

• Agora imos explicar o \n ao final da cadea. A barra invertida \ denomínase carácter de escape, o que quere dicir que debe de interpretarse doutro xeito o carácter que lle segue á dereita, neste caso n. O compilador interpreta a secuencia de escape \n coma un salto de liña ou nova liña (un INTRO ao final da cadea). Ampliaremos información sobre o carácter de escape máis adiante.
• Por último, e sentencia remata cun punto e coma (;). Toda sentencia en C debe rematar cun punto e coma. Esquecelo é o erro máis habitual nos primeiros programas, así que se o compilador vos da erro, deberiades empezar por comprobar se tedes todas as funcións rematadas ben.

[editar] Dúbidas

Agora vexamos algúns exemplos para despexar dúbidas:

[editar] Exemplo 1

main()
{
	printf("Ola");
	printf("mundo\n");
}

Isto imprime en pantalla: Olamundo, xa que a primeira liña en printf non posúe unha secuencia de escape que lle diga que existe un salto de liña (\n), nin tampouco a primeira liña posúe un espazo final (entre o a de Ola e as comiñas (") que sinalan a final da cadea de caracteres ou texto).

[editar] Exemplo 2

main()
{
	printf("Ola\nmundo!\n");
 }

Pola contra, este exemplo imprimiría:

Ola
mundo!