Bash/find
Se o usamos sen fornecerlle máis argumentos, find listará as rutas de todos os ficheiros do directorio de traballo. Se quere probalo, mellor que non sexa nun directorio repleto de ficheiros. Móvase (cd) a un directorio que conteña poucos ficheiros ou cree un.
Tamén se lle pode fornecer a continuación da orde un directorio, para que liste os ficheiros do directorio especificado. Véxase o exemplo:
find /ruta/ao/directorio/
Ademais, pódeselle pedir que busque ficheiros cun nome concreto precedendo o nome do ficheiro a buscar de -name.
find /ruta/do/directorio -name ficheiro
Asemade, pódese xogar co carácter * no nome do ficheiro. Este carácter indica que, onde está situado, pode non haber nada (ningún carácter), ou haber calquera cousa (calquera cantidade e combinación de caracteres). Véxanse os seguintes exemplos:
# Isto buscará os ficheiros que conteñan no nome a palabra ficheiro:
find /ruta/do/directorio -name *ficheiro*
# Isto buscará os ficheiros cuxo nome comece por "ficheiro"
find /ruta/do/directorio -name ficheiro*
Engadíndolle á orde o argumento -ls obteremos o resultado presentado tal e como se presentaría utilizando ls -l.
find /ruta/do/directorio -name ficheiro -ls