C/Identificadores

En Galilibros, o Wikibooks en galego.
< C
Saltar ata a navegación Saltar á procura
C
← Volver a Variables Identificadores Seguir con Tipos de datos fundamentais


Os identificadores definen nomes de variables, funcións, estruturas, macros, etc.

Regras de construción[editar]

Os identificadores, xa sexa de variables ou funcións, teñen que cumprir certas regras:

  • Non ser unha palabra reservada de C.
  • Non comezar por un díxito.
  • Conter só letras do alfabeto anglosaxón, díxitos e barras baixas (_).

As letras poden estar en maiúsculas e en minúsculas, e ademais cómpre ter en conta que na linguaxe de programación C as letras maiúsculas e minúsculas diferéncianse as unhas das outras. É dicir: a e A son identificadores completamente distintos.

Asemade, cómpre ten en conta que, se ben os nosos identificadores poden conter máis de 64 caracteres, o programa só utilizará eses 64 primeiros caracteres para diferenciar uns identificadores doutros.

Palabras reservadas[editar]

As palabras reservadas son identificadores que forman xa parte de C, e por tanto xa están collidos (non podemos facer novos identificadores chamados igual). As palabras clave en C son relativamente poucas (32).

Consellos de construción[editar]

Aínda que o noso programa vai funcionar fagámolo ou non, cómpre utilizar identificadores que sexan descritivos e favorezan ou axuden á comprensión do código, aínda que iso supoña facelos máis longos. Pero sen facelos extremadamente longos, claro está. Hai que buscar o equilibrio entre «facilidade para comprender o código» e «facilidade para codificalo».

Tamén cómpre ter en conta que variables e funcións non poden ter identificadores idénticos. Quizais sexa unha boa idea utilizar algún sistema para nomear sempre de xeito distinto unhas e outras, coma o uso de maiúscula inicial nas funcións, ou algún tipo de prefixo ou sufixo.


C
← Volver a Variables Identificadores Seguir con Tipos de datos fundamentais