Gettext/Ficheiros

En Galilibros, o Wikibooks en galego.
Saltar ata a navegación Saltar á procura
Gettext
← Volver a Aspectos Ficheiros Seguir con Ollada


As letras PO da extensión dos ficheiros .po significan “obxecto portable” (Portable Object), e distínguense dos ficheiros .mo, onde MO quere dicir “obxecto de máquina” (Machine Object). Este paradigma, así coma o formato PO, inspírase no estándar NLS desenvolvido por Uniform, e implementado por vez primeira no sistema Solaris de Sun.

Os ficheiros PO pensáronse para que os lesen e editasen persoas, e asocian cada cadea de texto orixinal traducible dun paquete á súa tradución nunha linguaxe especificada. Cada ficheiro PO contén cadeas nunha lingua concreta. Se un paquete soporta máis dunha lingua, haberá un ficheiro PO por cada lingua que soporte, e cada paquete terá o seu grupo de ficheiros PO. Estes ficheiros PO créaos o o programa xgettext, e máis adiante actualízanse co programa msgmerge. O programa xgettext extrae todas as mensaxes marcadas dunha serie de ficheiros C e crea un ficheiro PO con traducións baleiras. O programa msgmerge encárgase de axustar os ficheiros PO ás sucesivas versións dos códigos fonte correspondentes, comentando as entradas obsoletas, engadindo as novas, e actualizando todas as referencias ás liñas do código fonte. Os ficheiros con extensión .pot veñen sendo ficheiros base de tradución, en formato PO, coas cadeas traducidas baleiras, que servirán como modelo para os ficheiros PO traducidos.

Os ficheiros MO están pensados para que os lean as aplicacións, e son binarios. Algúns sistemas xa ofrecen ferramentas para a creación e manexo de ficheiros MO como parte do “Soporte de linguas nativas” que inclúe o sistema, pero o formato destes ficheiros MO adoita diferir dun sistema a outro, e non ser portable. As ferramentas que inclúen estes sisteman non soportan todas as funcionalidades do GNU gettext. Polo tanto, GNU gettext utiliza un formato para ficheiros MO de seu. Os ficheiros coa extensión .gmo son ficheiros MO dos que se sabe utilizan o formato de GNU.


Gettext
← Volver a Aspectos Ficheiros Seguir con Ollada