Análise e deseño detallado de aplicacións de informática e de xestión/Visión dos datos

Engadir ligazóns
En Galilibros, o Wikibooks en galego.


Arquitectura ANSI-SPARC das bases de datos[editar]

A arquitectura ANSI-X3-SPARC está baseada no concepto de computadores aniñados. Nesta arquitectura, cada sistema de bases de datos organízase segundo tres niveis de descrición de datos (esquemas):

  • O nivel interno ten un esquema interno, que describe a estrutura física de almacenamento da base de datos. É o nivel máis baixo de abstracción e describe como se almacenan realmente os datos.
  • O nivel conceptual ten un esquema conceptual, que describe a estrutura de toda a base de datos para unha comunidade de usuarios. Describe que datos se almacenan na base de datos e que relacións existen entre os datos.
  • O nivel externo ou de vistas inclúe varios esquemas externos ou vistas de usuario. Cada esquema externo describe a parte da base de datos que interesa a un grupo de usuarios determinado, e oculta a ese grupo o resto da base de datos. Describe só parte da base de datos completa.

Nun sistema de xestión de bases de datos baseado na arquitectura de tres esquemas, cada grupo de usuarios fai referencia exclusivamente ao seu propio esquema externo, polo tanto o sistema de xestión de bases de datos debe transformar unha solicitude expresada en termos dun esquema externo a unha solicitude expresada en termos do esquema conceptual, e logo a unha solicitude no esquema interno que se procesará sobre a base de datos almacenada.Se a solicitude é unha obtención de datos, será preciso modificar o formato da información extraída da base de datos almacenada para que coincida coa vista externa do usuario. O proceso de transformar solicitudes e resultados dun nivel a outro denomínase correspondencia ou transformación (mapping).

Independencia con respecto aos datos[editar]

A arquitectura de tres esquemas pode servir para explicar o concepto de independencia con respecto aos datos,que podemos definir como a capacidade para modificar o esquema nun nivel do sistema de bases de datos sen ter que modificar o esquema do nivel inmediatamente superior.

Podemos definir dous tipos de independencia con respecto aos datos:

  • A independencia lóxica con respecto aos datos é a capacidade de modificar o esquema conceptual sen ter que alterar os esquemas externos nin as aplicacións.
  • A independencia física con respecto aos datos é a capacidade de modificar o esquema interno sen ter que alterar o esquema conceptual ou os externos.

En todo sistemas de xestión de bases de datos de múltiples niveis precísase ampliar o dicionario de datos de xeito que inclúa información sobre como establecer a correspondencia entre as solicitudes e mailos datos entre os diversos niveis. O sistema de xestión de bases de datos utiliza software adicional para realizar estas correspondencias facendo referencia á información de correspondencia que se atopa no dicionario.

A independencia con respecto aos datos conséguese porque, ao modificar o esquema en algún nivel, o esquema do nivel inmediatamente superior permanece sen cambios. Só se modifica a correspondencia entre os dous niveis. Non é necesario modificar as aplicacións que fan referencia ao esquema de nivel superior. Polo tanto, a arquitectura de tres niveis pode facilitar o logro da verdadeira independencia con respecto aos datos, tanto física como lóxica.


Traído desde «https://gl.wikibooks.org/w/index.php?title=Análise_e_deseño_detallado_de_aplicacións_de_informática_e_de_xestión/Visión_dos_datos&oldid=15239»