PhpMyAdmin/Crear un campo

PhpMyAdmin
← Volver a Crear unha táboa	Crear un campo

Para crear un ou varios campos dentro dunha táboa, en primeiro lugar temos que chegar á páxina da táboa, a través do menú do marxe esquerdo do aplicativo. Unha vez na páxina da táboa, seleccionamos a lingüeta «Estrutura». Entón, na parte inferior da páxina, permitirásenos «Engadir» o número de campos que queiramos, e situar ditos campos na posición que queiramos respecto dos campos xa presentes na táboa. Unha vez seleccionado o número de campos e a súa situación, simplemente prememos «Executar», e chegaremos ao editor de campos. Tamén poderemos acceder ao editor de campos cando creemos unha nova táboa nunha base de datos.

A continuación encheremos un ou varios formularios (dependendo de se estamos a crear un ou varios campos), que nos pedirán a seguinte información para cada campo:

• Campo: nome do campo, sen espazos.
• Tipo: tipo de dato que se vai poder almacenar no campo. Tempos que reparar en todos os posibles valores que vai conter o campo, e seleccionar un tipo de dato en consecuencia, procurando evitar que no futuro se teña que cambiar o formato do mesmo. Véxanse os tipos de datos que manexa SQL no apéndice sobre tipos de datos.
• Tamaño / definición:
  • Tamaño (lonxitude): na meirande parte dos casos teremos que indicar aquí o tamaño ou lonxitude, é dicir, a cantidade de caracteres (numéricos ou alfanuméricos) que queremos asignarlle coma máximo ao campo en cuestión. Aínda que introducir este límite de lonxitude non é preciso, é moi recomendable, pois mellorará o rendemento da base de datos. Á hora de poñer o límite, cómpre ter certa visión de futuro, para así evitar problemas ou cambios de formato innecesarios no futuro.
• Padrón: é o valor por defecto que terá o campo. Podemos elixir entre:
  • Ningún: o campo non terá un valor por defecto.
  • Como se define: permítenos establecer persoalmente un valor por defecto para o campo no cadro de texto baixo o menú despregable.
  • NULL: o valor por defecto do campo será o valor nulo (NULL).
  • CURRENT_TIMESTAMP: o valor por defecto do campo corresponderase coa marca temporal do momento de creación de cada fila da táboa.
• Orde alfabética: codificación de caracteres segundo cuxo alfabeto se ordenarán os campos de texto cando proceda.
• Atributos: características adicionais do campo.
• Nulo: se se selecciona, o campo poderá ter un valor nulo (NULL), e se de deixa sen marcar a caixa non haberá tal posibilidade á hora de engadir datos nese campo. É dicir, se queremos que un campo teña que cumprimentarse obrigatoriamente, temos que deixar esta caixa sen marcar.
• Índice:
  • PRIMARY.
  • UNIQUE: cada fila terá neste campo un valor único, distinto do valor que teñan neste campo o resto de filas.
  • INDEX.
  • FULLTEXT.
• Incrementar automaticamente: se se marca a caixa, o valor de dito campo encherase automaticamente cun número unha unidade superior ao do mesmo campo na fila que o precede. Non fai falla que un campo que sexa «clave primaria» se incremente automaticamente, pero se un campo se incrementa automaticamente ten que ser clave primaria pola forza.
• Comentarios: este campo adoita completarse cunha descrición do campo ou do contido que este leva. Dita descrición non ten limitacións alfanuméricas nin de espazos.

Unha vez completados os formularios de todos os campos, abonda con premer «Executar», abaixo á dereita.

PhpMyAdmin
← Volver a Crear unha táboa	Crear un campo