Sintaxe da lingua galega/Os sintagmas

En Galilibros, o Wikibooks en galego.
Saltar ata a navegación Saltar á procura

Os sintagmas[editar]

Os sintagmas son palabras ou grupos de palabras que teñen mobilidade dentro da oración e que desenvolven determinadas funcións sintácticas tanto dentro da oración como dentro doutros sintagmas:

Hoxe - o carcereiro - colocou - un cadeado - na porta.
Na porta - o carcereiro - colocou - un cadeado - hoxe.

Para podermos estudar os sintagmas, temos que reparar...

  • nos tipos de sintagmas,
  • na estrutura dos sintagmas e mais nos seus compoñentes,
  • na función sintáctica dos sintagmas e na función sintáctica dos seus compoñentes.

Á parte destes complementos, na oración hai outras posibles funcións sintácticas que veremos máis adiante como o suxeito ou o complemento oracional.

Tipos de sintagmas[editar]

Sintagma verbal[editar]

O sintagma verbal desenvolve a función de predicado. Contén dentro de si un núcleo verbal (verbo) e outros posibles sintagmas que fan a función de

  • Complemento directo (CD).
  • Complemento indirecto (CI).
  • Complemento circunstancial (CC).
  • Atributo (A).
  • Complemento axente (CA).
  • Complemento do nome (CN).
  • Complemento de réxime ou suplemento (CR).

Sintagma nominal[editar]

O sintagma nominal contén como núcleo un substantivo ou unha secuencia que poida substituílo: pronome persoal, adxectivo substantivado, determinante en función pronominal...:

  • Os cidadáns chineses acurralaron o rabaño. -> Eles acurralaron o rabaño.
  • Os cidadáns chineses acurralaron o rabaño. -> Os chineses acurralaron o rabaño.
  • Eses cidadáns chineses acurralaron o rabaño. -> Eses acurralaron o rabaño.

A presenza dun núcleo é obrigada, como en todos os sintagmas. Ademais do núcleo, poden aparecer determinantes e modificadores:

Sintagma nominal.png

Sintagma adxectival[editar]

O sintagma adxectival contén como núcleo un adxectivo:

Os exames son cuadrimestrais.

A presenza dun núcleo é obrigada, como en todos os sintagmas. Ademais do núcleo, poden aparecer modificadores:

  • Adverbios: Os miñatos son moi mesquiños.
  • Sintagmas preposicionais: As gaivotas son mesquiñas de verdade.

Sintagma adverbial[editar]

O sintagma adverbial contén como núcleo un adverbio:

Están ben.

A presenza dun núcleo é obrigada, como en todos os sintagmas. Ademais do núcleo, poden aparecer modificadores:

  • Adverbios: Están moi ben.
  • Sintagmas preposicionais: Están ben de corpo e alma.

Sintagma preposicional[editar]

O sintagma preposicional está encabezado por unha ligazón que é unha preposición:

Os bacoriños alimentáronse con landras.

A presenza da ligazón ou preposición é obrigada. Tras o enlace hai un termo. O termo é un sintagma que pode estar constituído por unha soa palabra (núcleo) ou por varias:

  • con landras.
  • Os bacoriños alimentáronse con estas landras frescas.

Véxase tamén[editar]