HTML/Aprendizaxe

En Galilibros, o Wikibooks en galego.
Saltar ata a navegación Saltar á procura
HTML
Aprendizaxe Seguir con Requisitos


Por que aprender HTML?[editar]

Hai xente que, dado que existen programas que permiten escribir páxinas web sen necesidade de coñecer a HTML, non entende que sentido ten aprendela. E antes de comentar calquera outra cousa sobre a súa aprendizaxe, quizais cómpre salientar as razóns polas que de verdade resulta útil.

Os resultados obtidos ao crear páxinas web sen utilizar HTML adoitan ser, por regra xeral e en todos os aspectos, peores. A única vantaxe das ferramentas para a creación de páxinas web que non requiren de coñecer a linguaxe é a velocidade. E esta desvantaxe só é tal ao principio, dado que en canto se colle xeito escribir código HTML é unha cousa completamente sinxela e tan natural como escribir texto simple.

Ademais, a HTML dá ao usuario un control sobre o resultado final que sería imposible ter sen coñecer a linguaxe. O código será máis claro e máis limpo, o que reducirá a cantidade de código ─os editores web en modo visual sempre engaden código innecesario─, e por tanto reducirá o tamaño das páxinas web e mellorará a súa compatibilidade con todos os navegadores web existentes.

Asemade, a creación de páxinas web en modo visual sempre terá os seus límites, ao igual que un tradutor automático, por bo que sexa, sempre haberá cousas que non será capaz de traducir. Para este símil coñecer a HTML equivale a ser un lingüista profesional.

E por último, hai que pensar no futuro. Se de aquí a un tempo un quere introducirse na programación web avanzada, con linguaxes do lado do servidor e linguaxes de guións, por exemplo, será completamente imprescindible o coñecemento da HTML. Ningún programador ou deseñador web medianamente competente descoñece a linguaxe.

Dificultade[editar]

A dificultade para a aprendizaxe da linguaxe HTML é pouca. É unha linguaxe de representación ─non de programación─ moi sinxela, e fíxose máis sinxela co tempo grazas á delegación nas follas de estilo para o deseño ou o abandono dalgunhas técnicas.

Método[editar]

Dada a súa facilidade, dominar completamente esta linguaxe non debería supoñer un problema sempre e cando se acompañe o coñecemento teórico con moita práctica. É dicir, a medida que se aprendan novas cousas, cómpre ir poñéndoas en práctica.

Estaría ben crear un documento HTML, é dicir, un ficheiro de texto simple, e gardalo cun nome calquera, e coa extensión html. Por exemplo: probas.html, prácticas.html, index.html, wikibooks.html, nonsemeocorrecomochamaraestedocumento.html, etc. Neste documento poderanse ir utilizando as novas técnicas aprendidas ao longo do libro, e tras gardar os cambios no documento poderanse ver os resultados de ditas técnicas abríndoo cun navegador web.


HTML
Aprendizaxe Seguir con Requisitos