HTML/Requisitos

En Galilibros, o Wikibooks en galego.
HTML
← Volver a Aprendizaxe Requisitos


Coñecementos[editar]

Calquera usuario con coñecementos básicos de informática está capacitado para a aprendizaxe da HTML. De feito, o único que se necesita é saber manexar o rato e mailo teclado, e ter ganas de aprender.

Ferramentas[editar]

Para realizar e probar páxinas web necesítanse un editor de textos ─dado que as páxinas web só conteñen texto simple─ e un navegador web ─para visualizar o resultado ─.

Edición[editar]

As páxinas web poden escribirse con calquera editor de texto simple[1], resultando especialmente útiles aqueles que salientan as etiquetas HTML con cores para facelas máis lexibles.

Tamén existen algúns editores especialmente deseñados para a creación de páxinas web, algúns dos cales permiten a creación de páxinas sen necesidade de coñecementos de HTML ─tecnoloxía desaconsellada para aqueles que queiran aprender esta linguaxe─, ou contan con complexos xestores de proxectos de sitios web. Pero para o caso que nos ocupa, o mellor será un editor de texto simple que saliente a sintaxe dos documentos HTML.

Se non se coñece ningún editor deste tipo, no apartado de ferramentas faise referencia a unha ampla variedade de editores de texto.

Lectura[editar]

Despois de crear as páxinas web mediante o editor de texto, haberá que poñer a proba como se ven nun navegador web. De feito, para asegurar que a meirande parte dos lectores visualizan correctamente as páxinas web creadas, convén probalas nun bo número de navegadores distintos, e diversos. Os navegadores adoitan procesar as páxinas de maneira lixeiramente diferente, mesmo ás veces as len mal a pesar de que estas están ben escritas.

Á hora de escoller os navegadores nos que probar as páxinas, hai tres aspectos que cómpre ter en conta para escoller os navegadores. En primeiro lugar, o criterio máis obvio é a popularidade. As páxinas deberían lerse correctamente nos navegadores máis populares. Compre fixarse logo no sistema operativo e no ambiente, é dicir, os documentos deberían lerse correctamente nos principais navegadores dos distintos sistemas operativos, e no caso de GNU/Linux, nos navegadores máis populares de cada un dos seus ambientes de escritorio (KDE, Gnome, etc.). E finalmente compre probar as páxinas noutro tipo de navegadores, como os navegadores web en modo texto, os que traducen o texto á fala, etc.

Pódese obter unha ampla lista de navegadores que sería recomendable utilizar para ler as páxinas web creadas no apartado de ferramentas, na sección de navegadores web.

Notas[editar]

  1. Non confundir editor de texto con procesador de texto. O editor de texto escribe texto sen formato, mentres que os procesadores de texto, coma o OpenOffice.org ou o Koffice, dan formato ao texto.


HTML
← Volver a Aprendizaxe Requisitos