Perífrases verbais/Perífrases galegas/Tempo

En Galilibros, o Wikibooks en galego.
Saltar ata a navegación Saltar á procura
Galilibro
PERÍFRASES

VERBAIS

Wikibooks-logo.svg
Concepto
Locución verbal
Críticas
Problemas
As perífrases galegas
Bibliografía

A categoría tempo. A temporalidade[editar]

É preciso para comprendermos a categoría tempo distinguir coma Benveniste entre tempo físico, tempo cronolóxico e tempo lingüístico:

  • O tempo físico é un continuum. Carece en si de delimitacións. As lindes que nel observamos son percepcións alleas ó seu ilimitado decorrer.
  • O tempo cronolóxico (ou tempo) é o tempo dos sucesos e implica parámetros (día, estación,...) xa que a duración dos acontecementos e mensurable.
  • O tempo lingüístico (ou temporalidade) é o tempo interno do acto de fala, refire todo o que se transmite nun relato a un punto orixinario que é o instante en que se produce a emisión da mensaxe. A diferencia entre o tempo cronolóxico e o lingüístico consiste en que os termos cronolóxicos son parámetros fixos que fraccionan o tempo físico, o tempo lingüístico implica que un suceso poida ser amentado, dependendo do momento ó cal a súa temporalidade faga referencia, con temporalidades diferentes.

No galego, a temporalidade lingüística ten valor de categoría gramatical como noción asociada á clase de palabra verbo, se ben outros tipos de palabra como o adverbio soportan nocións de temporalidade. Esta categoría gramatical enmarca o desenvolvemento dun proceso verbal nunhas coordenadas temporais (pasado, presente e futuro). Segundo Guillermo Rojo o característico da temporalidade verbal é a expresión de anterioridade, posterioridade ou simultaneidade dun feito con respecto a outro ou con respecto a unha orixe que é variable aínda que poida coincidir habitualmente co momento en que se realiza a comunicación.