Esquizofrenia/Que é?/A esquizofrenia como enfermidade

En Galilibros, o Wikibooks en galego.
Saltar ata a navegación Saltar á procura
Galilibro
A ESQUIZOFRENIA
Wikibooks-logo.svg
Introdución
Historia
Tratamento
Máis información

Os primeiros síntomas da esquizofrenia xeralmente son cambios peculiares do comportamento. Estes síntomas poden causar desconcerto e confusión nos familiares do enfermo. A presenza destes síntomas é especialmente chocante para os familiares máis próximos que coñecían como era o paciente antes de enfermar. Resulta extremadamente difícil comprender como unha persoa que era tan saudable e chea de vida pode ter un cambio tan drástico. A aparición súbita de síntomas psicóticos coñécese como a fase "aguda" da esquizofrenia. A "psicose", un estado común na esquizofrenia, representa un deterioro mental marcado. As alucinacións, como o oír voces que non son reais, son un trastorno da percepción moi común. Tamén son comúns os delirios, é dicir o desenvolver crenzas falsas que xorden como consecuencia da incapacidade para distinguir o real do imaxinario. Outro síntoma menos obvio é o illamento social, é dicir o evitar o contacto social con familiares, amigos e outras persoas. Dito illamento pode presentarse antes, ao mesmo tempo, ou logo dos síntomas psicóticos.

A evolución da esquizofrenia é variable. Algunhas persoas sofren un só episodio psicótico e recupéranse. Outras teñen moitos episodios de psicose no transcurso da súa vida, pero entre estes períodos levan unha vida normal. Outras persoas sofren de esquizofrenia "crónica", a que se manifesta en forma continua ou recorrente. Estas xeralmente non se recuperan totalmente e requiren tratamento con medicamentos a longo prazo.

A esquizofrenia dáse en todas as partes do mundo. A gravidade dos síntomas e a longa duración da enfermidade tenden a causar un alto grao de discapacidade. Os medicamentos e outros tratamentos usados para a esquizofrenia serven para reducir e controlar os síntomas, só se se seguen do xeito indicado polo médico. Malia todo, algunhas persoas non se benefician moito cos tratamentos dispoñibles. Outras suspéndenos de xeito prematuro. Unha das razóns para que isto suceda é a presenza de efectos secundarios da medicación, os cales poden ser desagradables e inconvenientes. Inclusive cando o tratamento en si é moderadamente efectivo, a capacidade de funcionamento dalgúns enfermos é afectado pola falta de oportunidades de traballo, o estigma que se asocia con esta enfermidade e os síntomas que non melloran coa medicación.

¿Poden sufrir de esquizofrenia os nenos?[editar]

Os nenos maiores de cinco anos poden desenvolver esquizofrenia, pero é moi raro que esta enfermidade se presente antes da adolescencia. Algúns nenos que desenvolven esquizofrenia teñen peculiaridades de personalidade ou comportamento que preceden a enfermidade. Os síntomas comúns nos adultos, as alucinacións e os delirios, son extremadamente raros antes da adolescencia.