Esquizofrenia/Tratamento/efectos secundarios

En Galilibros, o Wikibooks en galego.
Galilibro
A ESQUIZOFRENIA
Wikibooks-logo.svg
Introdución
Historia
Tratamento
Máis información

Como xa dixemos, os medicamentos antipsicóticos, do mesmo xeito que practicamente tódolos medicamentos, producen efectos indesexados xunto cos efectos beneficiosos. Durante as fases iniciais do tratamento con medicamentos, os pacientes poden sufrir efectos secundarios tales como somnolencia, inquietude, espasmos musculares, tremores, boca seca ou visión nubrada. A maioría destes efectos poden corrixirse reducindo a dose ou poden ser controlados por outros medicamentos. Cada paciente pode reaccionar dun xeito diferente a un mesmo medicamento. É dicir, tomando o mesmo medicamento un paciente pode desenvolver un efecto secundario, mentres que outro paciente non desenvolve ningún ou desenvolve un efecto secundario diferente. O paciente pode sentirse mellor cun medicamento ca con outro.

Os efectos secundarios que resultan do tratamento a longo prazo con medicamentos antipsicóticos poden ser máis serios. A disquinesia tardía ou DT (TD, siglas en inglés) é un trastorno caracterizado por movementos involuntarios repetidos que usualmente afectan a boca, os beizos e a lingua, e ocasionalmente o tronco, os brazos e as pernas. Preséntase no quince ao vinte por cento dos pacientes tratados durante moitos anos con medicamentos antisicóticos "típicos". A DT tamén pode desenvolverse en pacientes tratados con estes medicamentos por curtos períodos de tempo. Na maioría de casos, os síntomas de DT son leves e o paciente pode non darse conta dos movementos anormais.

Os medicamentos antipsicóticos desenvolvidos nos últimos anos, tamén coñecidos como "antipsicóticos atípicos", posiblemente conlevan un risco moito menor de producir DT cós medicamentos máis antigos, tamén coñecidos como "antisicópticos típicos". Pero, malia a que os novos medicamentos teñen en xeral menos riscos, non están completamente libres de efectos secundarios. Por exemplo, poden producir aumento de peso, se se administran en doses demasiado altas, poden producir problemas tales como illamento social e síntomas parecidos á enfermidade de Parkinson, un trastorno do movemento do corpo. Así a todo, os antipsicóticos atípicos representan un avance significativo no tratamento, e o seu uso óptimo nos pacientes esquizofrénicos é obxecto de varias investigacións actuais.