Esquizofrenia/Que é?/Causa

Cal é a causa da esquizofrenia?

Non se identificou unha causa única para a esquizofrenia. Moitas enfermidades, tales como as cardíacas, son o resultado da interacción de factores xenéticos, do comportamento e outros. É posible que ese sexa tamén o caso na esquizofrenia. Os científicos aínda non descubriron os factores que son necesarios para que se produza. Hoxe en día, estanse empregando tódalas ferramentas da investigación biomédica moderna para aclarar que papel xogan os xenes, cales son os momentos críticos do desenvolvemento cerebral e que outros causas contribúen no desenvolvemento da enfermidade.

¿A esquizofrenia é hereditaria?

Sábese dende fai tempo que a esquizofrenia vén de familia. As persoas que teñen un parente próximo con esquizofrenia teñen unha probabilidade maior de desenvolver a enfermidade cás persoas que non teñen parentes enfermos. Por exemplo, o xemelgo monocigótico (idéntico) dunha persoa con esquizofrenia ten unha probabilidade máis alta, corenta a cincuenta por cento, de desenvolver a enfermidade. Unha persoa que ten pai ou nai doente ten aproximadamente unha probabilidade do dez por cento. Comparativamente, o risco de esquizofrenia na poboación xeral é de aproximadamente o un por cento.

Os científicos están estudando os factores xenéticos da esquizofrenia. É probable que múltiples xenes estean implicados na predisposición á enfermidade. Ademais, é posible que factores tales como dificultades prenatais, malnutrición intrauterina, infeccións virais durante a xestación, complicacións perinatais e outros factores contribúan a que se produza a enfermidade. Aínda non se coñece como se transmite a predisposición xenética e non se pode predicir se unha persoa en particular desenvolverá ou non a enfermidade.

Actualmente estanse investigando varias rexións do xenoma humano para identificar os xenes que confiren susceptibilidade á esquizofrenia. A evidencia máis sólida ata a data indica que os cromosomas 13 e 16 poden estar implicados, pero isto aínda non se confirmou. A identificación dos xenes específicos que participan no desenvolvemento desta enfermidade proporcionará información importante sobre que é o que deixa de funcionar no cerebro, e permitirá o desenvolvemento de tratamentos mellores.

¿A esquizofrenia asóciase cun defecto químico no cerebro?

O coñecemento da química cerebral e do seu vencello coa esquizofrenia está véndose ampliado rapidamente. Dende fai tempo crese que os neurotransmisores, substancias que permiten a comunicación entre as células nerviosas, están implicados no desenvolvemento da esquizofrenia. É probable, aínda que non se sabe con certeza, que o trastorno se deba a un desequilibrio dos sistemas químicos complexos e interrelacionados do cerebro. Tamén é probable que os neurotransmisores dopamina e glutamato estean implicados. Esta área de investigación é prometedora.

¿A esquizofrenia é causada por unha anormalidade física do cerebro?

As técnicas de imaxes do sistema nervioso permiten aos científicos estudar a estrutura e función do cerebro en persoas vivas. Esta tecnoloxía avanzou significativamente nos últimos tempos. En varios estudos descubríronse anormalidades na estrutura do cerebro. Por exemplo, unha dilatación das cavidades cheas de fluído chamadas ventrículos, e un encollemento de certas rexións. Tamén se descubriron anormalidades nas funcións. Por exemplo, unha redución da actividade metabólica en certas rexións do cerebro. Debe enfatizarse que estas son anormalidades sutís e non se observan en tódalas persoas con esquizofrenia. Tampouco ocorren unicamente nas persoas que sofren a enfermidade. Os estudos microscópicos do tecido cerebral obtidos logo da morte do paciente mostran cambios menores na distribución e o número das células cerebrais. Aparentemente moitos destes cambios, aínda que probablemente non todos, prodúcense antes de que a persoa enferme.

Crese que a esquizofrenia pode ser, en parte, un trastorno do desenvolvemento do cerebro. Os neurobiólogos patrocinados polo National Institute of Mental Health (NIMH) que estudan o desenvolvemento do sistema nervioso descubriron que a esquizofrenia se produce cando as neuronas forman conexións incorrectas durante o desenvolvemento do feto. Estes defectos poden non manifestarse ata a pubertade, cando os cambios cerebrais que ocorren normalmente durante esta etapa de maduración interactúan adversamente coas conexións defectuosas. Estes estudos de investigación motivaron esforzos para identificar os factores prenatais que producen estas anormalidades no desenvolvemento cerebral.

En estudos con técnicas de imaxes cerebrais, os investigadores acharon evidencia de cambios bioquímicos temperáns que poden ser anteriores á presentación dos síntomas da enfermidade. Estes achados suxiren que é necesario examinar os circuítos de neuronas que probablemente estean implicados na produción deses cambios. Doutra banda, os científicos que traballan no aspecto molecular están explorando a base xenética das anormalidades no desenvolvemento cerebral e dos sistemas neurotransmisores que controlan a función cerebral.

capítulo anterior:	O mundo das persoas con esquizofrenia
capítulo seguinte:	Tratamento